На 17.03.2017 г., во организација на Општина Ресен и Домот на Културата „Драги Тозија“, во просториите на ресенскиот Сарај, беше одржана изложба „Портретите на Свети Јован Владимир на Балканот, од XVII-XIX век“ и промоција на монографијата „Светиот кнез Владимир“.
На промоцијата присуствуваше и воведно слово одржа Митрополитот Преспанско-пелагониски г. Петар, кој посебно ја нагласи улогата на Светиот кнез Јован Владимир во будењето и разгорувањето на православната свест кај Балканските народи, како и одговорноста која што треба да се роди кај истите, во осветлувањето на неговиот лик и дело.
Изложбата, која во декември беше поставена во изложбениот салон на МАНУ, ја претстави проф. д-р, Сашо Цветковски, а за монографијата говореа академик Сретен Перовиќ и Милорад Алексиќ од Црна Гора.
На настанот настапи и хорот „Св. Ахил Преспански“ со интерпретација на црковна византиска музика, а се читаа и фрагменти од стихозбирката „Така љубеше Косара“ од Лидија Дочовска Павловска.
Отворањето на изложбата и промоцијата на монографијата се продолжение на воспоставената соработка од областа на културата која општина Ресен ја заснова со општина Бар од Црна Гора и општината Елбасан од Албанија.
photo: Dejan Krstevski
Focus production
Извор: Курир.мк
