Денес, на 03.07.2026 година, кога Светата Православна Црква го празнува споменот на Свети Наум Охридски Чудотворец, во храмот посветен на овој голем Македонски просветител и Божји угодник – „Свети Наум Охридски“ во Битола, беше отслужена Света Архиерејска Божествена Литургија.

Со Светата Литургија началствуваше Неговото Високопреосвештенство, Митрополитот Преспанско-пелагониски г. Петар, во сослужение на протоерејот Игор Ризановски и протоѓаконот Драган Ѓоргиевски.

Во молитвена радост и благодарност кон Бога, верниот народ се собра да го прослави споменот на Свети Наум Охридски – ученик на светите рамноапостолни Кирил и Методиј, соподвижник на Свети Климент Охридски и еден од најголемите столбови на Охридската духовна и просветителска традиција. Неговиот светол лик и денес ја укрепува верата на верниот народ, повикувајќи нè на молитва, смирение, љубов кон Бога и верност кон светото православно предание.

Нека по молитвите на Свети Наум Охридски Чудотворец, Господ им дарува духовна крепост, мир и спасение на сите што со вера го празнуваат неговиот свет спомен.